ಅವ್ಯಕ್ತಾನಂದ

ಹೊನ್ನ ಕಿರಣ ಮೆತ್ತಿದ ಮುಖಾರನ್ದವಿಂದದ

ಮುಗ್ಧತೆ ,ಹವಳ ತುಟಿಯಂಚಿನ ನಗೆಯ

ಶುಭ್ರತೆಯ ವಿಜ್ರುಮ್ಬಿಸಿ ಮುದವಾಗಿ,

ಹದವಾಗಿ ಹೆಣೆದು ಕೊಂಡವು ಕನಸುಗಳು .

ನಿನ್ನ ಕಂಗಳ ಮಿಂಚಿಗೆ ಇರುಳೂ ಹಗಲಾಗಿ

ಮನದ ತುಂಬೆಲ್ಲ ಲಕ್ಷ ದೀಪಗಳ ಹೊಳಪು

ಪ್ರತಿಬೆಳಕಿಗೂ ಮಾತು ಮುತ್ತಾಗಿಸಿ ಭಾವ

ದೊಲುಮೆಯ ಗೂಡು ಕಟ್ಟುವ ಮುಗಿಲಗಲದ ಕನಸು .

ನಿನ್ನ ಮೋಹಕ ನುಡಿಗೆ ತುಂತುರು ಮಳೆ ಬಿರಿದು

ನೆಲವ ಮುತ್ತಿಕ್ಕಿ ,ಜಾಲಿ ಮರದಲ್ಲಿ ಮಲ್ಲಿಗೆ ಮೊಗ್ಗು

ಬಿರಿದು ,ಸುಡು ಸುಡು ಬೇಗೆಯಲ್ಲಿ ನೆಳಲು ಸಿಕ್ಕಿ

ಸುಮ್ಮನಿಹ ಮನದಲ್ಲಿ ತಂಗಾಳಿ ಬೀಸಿದಂತಹ ಅನುಭವ !

ನಿನ್ನ ಕೆಮ್ಪುಕೆನ್ನೆಯ ಗುಳಿಯ ಆಕರ್ಷಣೆಗೆ ವ್ಯಕ್ತದಲೂ

ಅವ್ಯಕ್ತಭಾವ ,ವರ್ಣನೆಯಲೂ ಅವರ್ಣನೀಯದಾನಂದ

ಹೊಮ್ಮಿ ನೆಲಕಚ್ಚಿ ನಿಂತ ಕಾಲಗಳು ನೆಲ ಬಿಟ್ಟು ಹಾರಿ

ಬಾನ ತಾರೆಗಳ ಸ್ಪರ್ಶಿಸಿದಂತಹ ಪುಳಕ .