ಕವಿ ಹೃದಯ

ಮತ್ಸರ ಬೇಡ ಗೆಳೆಯ

ಕವಿ ಹೃದಯವ ನೀ ಚಿವುಟಲಾರೆ

ಭಾವ ಪನ್ನೀರ ಬಿಂದುಗಳ

ಸಿಂಚಿಸಿ ಧಮನಿ ಧಮನಿಗಳಲ್ಲೂ

ಸ್ಫೂರ್ತಿಯ ಸೃಜಿಸುವ ಎನ್ನ

ಕಾವ್ಯ ಶಕ್ತಿಯ ನೀ ತಡೆಯಲಾರೆ

ಮನದೊಳು ಗುಪ್ತಗಾಮಿನಿಯಾಗಿ

ಹರಿವ ಸ್ನೇಹ ಸೌದಾಮಿನಿಯಡಿ

ಹೊರಬಂದ ಅನುರಾಗವ ನಿಲ್ಲಿಸಲಾರೆ

ಭಾವಾನುರಾಗದ ಮಧುರಾಲಾಪವ

ನೀ ಅಪಸ್ವರದಿ ಮುಳುಗಿಸಲಾರೆ

ಕವಿ ಹೃದಯದ ಭಾವ ಸಂಚಲನೆಗಳ

ಸಂವೇದನೆಯ ವಿಜಯ ದುಂಧುಬಿಯ

ಮೊಳಗಿಸುವ ಕಾವ್ಯ ಮದ್ದಳೆಯ

ಪಕ್ಕಕ್ಕೆ ದೂಡಲಾರೆ,ಪದಗಳ ಮುದ್ದಿಸಿ ,

ಕುಣಿಸಿ ,ಲಾಲಿಸಿ ,ನಲಿಸಿ ಹುಟ್ಟಿಸಿದ

ಕವನದ ಹೊಳೆಯೊಳು ಎನ್ನ ಕೆಣಕಿದ

ನೀ ಕೊಚ್ಚಿ ಹೋಗುವೆ ಗೆಳೆಯ